SCALING

ໂຄງການຮ່ວມມືປັບປຸງດ້ານໂພຊະນາການແມ່ນໂຄງການໜຶ່ງທີ່ເຮັດວຽກຮ່ວມກັບຫຼາຍຂະແໜງການທີ່ກ່ຽວຂ້ອງ ໂດຍໄດ້ຮັບທຶນສະໜັບສະໜູນຈາກ ສະຫະພາບ ເອີຣົບ (EU). ໂຄງການດັ່ງກ່າວໄດ້ເປັນສ່ວນໜຶ່ງຂອງຄູ່ຮ່ວມຈັດຕັ້ງປະຕິບັດໂຄງການປັບປຸງດ້ານໂພຊະນາການຢູ່ ສປປ. ລາວ (PIN).

ຈຸດປະສົງລວມຂອງໂຄງການ ແນ່ໃສ່ເພື່ອປັບປຸງດ້ານໂພຊະນາການຂອງໄວຫນຸ່ມຍິງ, ຜູ້ຍິງຖືພາ, ແມ່ທີ່ກຳລັງລ້ຽງລູກດ້ວຍນົມ ແລະ ເດັກນ້ອຍ ອາຍຸຕໍ່າກວ່າ 5 ປີ ລົງມາຢູ່ໃນເຂດພື້ນທີ່ໂຄງການ ຢູ່ໃນ 14 ເມືອງເປົ້າໝາຍຂອງສີ່ແຂວງພາກເໜືອຂອງລາວຄື: ແຂວງ ຫົວພັນ, ຫຼວງນໍ້າທາ, ຫຼວງພະບາງ ແລະ ຜົ້ງສາລີ.

ແຜນງານໂຄງການແມ່ນສະໜັບສະໜູນລັດຖະບານລາວ ເພື່ອປະຕິບັດຍຸດທະສາດແຫ່ງຊາດດ້ານໂພຊະນາການ (NNS), ແຜນປະຕິບັດງານແຫ່ງຊາດດ້ານໂພຊະນາການ (NNSAP) ແລະ ໃນຮູບແບບທີ່ສອດຄ່ອງ. ໄລຍະເວລາຈັດຕັ້ງປະຕິບັດໂຄງການແມ່ນເລີ່ມແຕ່ເດືອນ ທັນວາ ປີ 2017 ຈົນເຖິງ ເດືອນ ມິຖຸນາ ປີ 2022 (54 ເດືອນ).

ໂຄງການ SCALING ຖືກຈັດຕັ້ງປະຕິບັດໂດຍ ຄູ່ຮ່ວມງານຈາກ 04 ອົງການຈັດຕັ້ງສາກົນທີ່ບໍ່ສັງກັດລັດຖະບານຄື: CARE, Comité de Coopération avec le Laos (CCL), ChildFund in Laos (CFL) and Save the Children (SCI) ເຊິ່ງວ່າອົງການ SCI ເປັນຜູ້ນໍາໜ້າພາທາງໃນຂະບວນການປະຕິບັດໂຄງການ.

ອົງປະກອບທີ 1 ແນໃສ່ໃຫ້ບັນລຸການປ່ຽນແປງດ້ານພຶດຕິກຳຢູ່ຂັ້ນຊຸມຊົນໂດຍເນັ້ນໜັກໃສ່ຄອບຄົວ 1.000 ວັນ. ນອກຈາກນີ້ຍັງໄດ້ເນັ້ນໜັກໃສ່ ສົ່ງເສີມການປ່ຽນແປງດ້ານພຶດຕິກຳທີ່ພົວພັນເຖິງດ້ານສຸຂະອະນາໄມສ່ວນບຸກຄົນ, ບົດບາດທາງເພດ, ວຽກງານສຸຂະພາບຈະເລີນພັນ ແລະ ໂພຊະນາການສຳລັບກຸ່ມໄວໜຸ່ມ ເດັກຍິງ ແລະ ເດັກຊາຍ ຢູ່ໃນໂຮງຮຽນມັດທະຍົມຕອນຕົ້ນ. ອີກຈຸດໜື່ງຂອງອົງປະກອບນີ້ແມ່ນໄດ້ເນັ້ນໜັກເພື່ອສົ່ງເສີມໃຫ້ເຂົ້າເຖິງ ການບໍລິການດ້ານໂພຊະນາການ ແລະ, ແມ່ ແລະ ເດັກເກີດໃໝ່ (RNMCH) ທີ່ມີຄຸນນະພາບຢູ່ໃນສະຖານທີ່ບໍລິການສຸຂະພາບ ແລະ ໜ່ວຍງານ ແພດເຄື່ອນທີ່ເສື່ອມສານ ທີ່ໃຫ້ບໍລິການຢູ່ບັນດາບ້ານເຂດຊົນນະບົດຫ່າງໄກ.

ອົງປະກອບທີ 2 ແກ້ໄຂປັດໃຈສະພາບແວດລ້ອມທີ່ສົ່ງຜົນກະທົບຕໍ່ດ້ານໂພຊະນາການ. ແນໃສ່ເສີມຂະຫຍາຍບົດບາດຂອງແມ່ຍິງ ໃຫ້ມີການຕັດສິນໃຈຫຼາຍຂື້ນ, ໜ້າວຽກຫຼຸດລົງ ແລະ ມີອຳນາດໃນການຄຸ້ມຄອງຊັບພະຍາກອນເພື່ອຮັກສາສຸຂະພາບໃຫ້ດີ. ນອກຈາກນີ້ຍັງໄດ້ປັບປຸງການເຂົ້າເຖີງ ແລະ ຊົມໃຊ້ພື້ນຖານໂຄງລ່າງ, ລະບົບນໍ້າ ແລະ ສຸຂະອະນາໄມ ຢູ່ໃນບັນດາບ້ານເປົ້າໝາຍ ແລະ ເຂົ້າເຖິງແຫຼ່ງອາຫານ ແລະ ນຳໃຊ້ອາຫານທີ່ຖືກຕາມຫຼັກໂພຊະນາການ.

ອົງປະກອບທີ 3 ເນັ້ນໜັກໃສ່ສ້າງຄວາມເຂັ້ມແຂງດ້ານຂອດປະສານງານຂອງຫຼາຍຂະແໜງການທີ່ກ່ຽວຂ້ອງກັບວຽກໂພຊະນາການຂອງພາກລັດຖະບານ ແລະ ຮັບປະກັນໃຫ້ບັນດາແຂວງ ແລະ ເມືອງ ມີຄວາມເຂົ້າໃຈເປັນເອກະພາບຕໍ່ກັບແນວທາງນະໂຍບາຍ ແລະ ຍຸດທະສາດດ້ານໂພຊະນາການຂອງລັດຖະບານ. ອົງປະກອບດັ່ງກ່າວນີ້ຍັງໄດ້ໃຫ້ການສະໜັບສະໜູນ ແກ່ບັນດາບ້ານເປົ້າໝາຍໃນການສ້າງແຜນພັດທະນາຂັ້ນບ້ານເຊິ່ງໄດ້ກຳນົດແຜນກິດຈະກຳໂພຊະນາການເຂົ້ານຳ.

ໃນນາມຄູ່ຮ່ວມຈັດຕັ້ງປະຕິບັດໂຄງການທີ່ມີສີ່ອົງກອນ ແມ່ນມີຄວາມຍິນດີໃຫ້ແຕ່ລະອົງກອນນຳໃຊ້ເຄື່ອງມື ແລະ ອຸປະກອນຕ່າງໆເພື່ອຮັບໃຊ້ເຂົ້າໃນການຈັດຕັ້ງປະຕິບັດວຽກໂຄງການ ແລະ ລວມທັງອົງກອນອື່ນໆກໍ່ສາມາດນຳເອົາເຄື່ອງມື ແລະ ອຸປະກອນດັ່ງກ່າວໄປໝູນໃຊ້ໄດ້ເຊັ່ນດ່ຽວກັນ. ຢ່າງໃດກໍ່ຕາມຖ້າຫາກອົງກອນອື່ນໆມີຄວາມສົນໃຈເອົາໄປນຳໃຊ້ ແລະ ມີຄວາມຈຳເປັນຕ້ອງໄດ້ຈັດພິມຄືນໃໝ່ນັ້ນ ຕ້ອງເອົາເຄື່ອງໝາຍສັນຍາລັກ (ໂລໂກ້) ຂອງສະຫະພາບ ເອີຣົບ ແລະ ໂລໂກ້ຂອງໂຄງການ SCALING ອອກເສຍກ່ອນ ແລະ ໃຫ້ໃສ່ຂໍ້ຄວາມທີ່ວ່າ: “ເຄື່ອງມື/ອຸປະກອນນີ້ …….. ແມ່ນຖືກພັດທະນາໂດຍໂຄງການ SCALING (2017-2022) ໂດຍການສະໜັບສະໜູນຈາກສະຫະພາບ ເອີຣົບ” ທ່ານສາມາດດັດປັບເນື້ອໃນຂອງ ເຄື່ອງມື/ອຸປະກອນດັ່ງກ່າວໃຫ້ມີຄວາມສອດຄ່ອງກັບສະພາບຕົວຈິງຂອງທ່ານໄດ້.

ຖ້າທ່ານຕ້ອງການຂໍ້ມູນເພີ່ມເຕີມກ່ຽວກັບເຄື່ອງມືຮັບໃຊ້ສຳລັບບົດບາດທາງເພດ ທ່ານສາມາດຕິດຕໍ່ພົວພັນນຳທີມງານອົງການ CARE ໄດ້ທີ່ Lao.info@careint.org.

ຖ້າທ່ານຕ້ອງການຂໍ້ມູນເພີ່ມເຕີມກ່ຽວກັບວິທີການຈັດຕັ້ງປະຕິບັດ ວຽກການໃຫ້ຄຳປຶກສາດ້ານການເກີດລູກທີ່ປອດໄພ ແລະ ຄວາມຮັບຜິດຊອບຮ່ວມກັນລະຫ່ວາງໂຮງໝໍນ້ອຍ ແລະ ຊຸມຊົນໃນການບໍລິການດ້ານສຸຂະພາບ ທ່ານສາມາດຕິດຕໍ່ພົວພັນນຳທີມງານຂໍ້ມູນຂ່າວສານຂອງອົງການ SCI ໄດ້ທີ່ communications.laos@savethechildren.org

Gertjan van Bruchem, SCALING Project Director, 26 March 2022