- Home
- >
- ກ່ຽວກັບພວກເຮົາ
- >
- ຄວາມເປັນມາ
Highlight
ຄວາມເປັນມາ
SUN CSA ລາວ – ເຄືອຂ່າຍອົງການຈັດຕັ້ງທາງສັງຄົມເພື່ອສົ່ງເສີມໂພຊະນາການລາວ – ແມ່ນເຄືອຂ່າຍຂອງ 60 ກວ່າອົງກອນໃນ ສປປ ລາວ ທີ່ເຮັດວຽກເພື່ອສະໜັບສະໜູນຄວາມພະຍາຍາມຂອງລັດຖະບານໃນການປັບປຸງໂພຊະນາການຂອງ ສປປ ລາວ. SUN CSA ແມ່ນເປັນສ່ວນໜຶ່ງຂອງ ຂະບວນການເຄື່ອນໄຫວສາກົນ.
ການສົ່ງເສີມໂພຊະນາການ ຫຼື SUN ແມ່ນຂະບວນການເຄື່ອນໄຫວສາກົນທີ່ມຸ່ງໝັ້ນໃນການປັບປຸງໂພຊະນາການ, ໂດຍສຸມໃສ່ການຫຼຸດຜ່ອນຄວາມອຶດຫິວ ແລະ ການຂາດສານອາຫານໃນເດັກ ແລະ ກຸ່ມສ່ຽງອື່ນໆ. SUN ໄດ້ຮັບການສ້າງຕັ້ງຂຶ້ນບົນຫຼັກການທີ່ວ່າ ທຸກຄົນມີສິດໃນການເຂົ້າເຖິງອາຫານ ແລະ ໂພຊະນາການທີ່ດີ. ຂະບວນການດັ່ງກ່າວໄດ້ເຕົ້າໂຮມເອົາຜູ້ຄົນຈາກພາກລັດຖະບານ, ອົງການຈັດຕັ້ງທາງສັງຄົມ, ອົງການສະຫະປະຊາຊາດ, ຜູ້ໃຫ້ທຶນ, ພາກທຸລະກິດ ແລະ ນັກຄົ້ນຄວ້າ ເພື່ອສຸມຄວາມພະຍາຍາມຮ່ວມກັນໃນການປັບປຸງໂພຊະນາການ.
ສປປ ລາວ ເຂົ້າຮ່ວມຂະບວການເຄື່ອນໄຫວສາກົນໃນປີ 2011, ໂດຍໄດ້ສ້າງຕັ້ງກອງເລຂາ SUN ລາວ ຊຶ່ງນຳພາໂດຍສູນໂພຊະນາການແຫ່ງຊາດ ທີ່ຂຶ້ນກັບກະຊວງສາທາລະນະສຸກ, ຊຶ່ງຖືເປັນການສຸມຄວາມມຸ່ງໝັ້ນຂອງລັດຖະບານໃນການຮ່ວມມືກັນເພື່ອເລັ່ງໃສ່ວຽກງານຄວາມໝັນຄົງດ້ານສະບຽງອາຫານ ແລະ ໂພຊະນາການທີ່ນຳພາໂດຍກະຊວງສາທາລະນະສຸກ ໃຫ້ມີຄວາມກ້າວໜ້າ.
ປັດຈຸບັນ ໃນ ສປປ ລາວ ມີເຄືອຂ່າຍຂອງ SUN ສີ່ເຄືອຂ່າຍໄດ້ຮັບການສ້່ງຕັ້ງຂຶ້ນ ເພື່ອສຸມຄວາມພະຍາຍາມຮ່ວມກັນໃນການປັບປຸງໂພຊະນາການໃນປະເທດ. ບັນເຄືອຄ່າຍດັ່ງກ່າວລວມມີ:
- ເຄືອຂ່າຍອົງການຈັດຕັ້ງທາງສັງຄົມເພື່ອສົ່ງເສີມໂພຊະນາການ (SUN CSA);
- ເຄືອຂ່າຍຜູ້ໃຫ້ທຶນ;
- ເຄືອຂ່າຍອົງການສະຫະປະຊາຊາດ;
- ເຄືອຂ່າຍທຸລະກິດ;
ສະຖານະດ້ານໂພຊະນາການໃນ ສປປ ລາວ
ມີຫຼາຍແຫຼ່ງຂໍ້ມູນດ້ານໂພຊະນາການໃນ ສປປ ລາວ ທີ່ເປັນປະໂຫຍດ. ແຫຼ່ງຂໍ້ມູນດັ່ງກ່າວລວມມີ SUN Laos page. ບົດສະຫຼຸບທີ່ນຳສະເໜີດ້ານລຸ່ມນີ້ແມ່ນໄດ້ຈາກ ‘Lao Social Indicator Survey II 2017, Survey Findings Report’, ທີ່ຜະລິດໂດຍ Lao Statistics Bureau ໃນປີ 2018.
- ອັດຕາສ່ວນຂອງເດັກອາຍຸຕໍ່າກວ່າ 5 ປີ ທີ່ຈະເລີນເຕີບໂຕຊ້າ (ລວງສູງຕໍ່ອາຍຸຕໍ່າ) ຫຼຸດລົງຈາກ 44% ໃນ LSIS-I ມາເປັນ 35.6% ໃນປີ 2015 (ການສຳຫຼວດປະເມີນການວັດຮ່າງກາຍຂອງເດັກນ້ອຍລາວ) ແລະ ຫຼຸດລົງເປັນ 33% ໃນປີ 2017. ເຖິງແມ່ນວ່າອັດຕາດັ່ງກ່າວຈະມີທ່າອ່ຽງຫຼຸດລົງເລື້ອຍໆກໍ່ຕາມ ແຕ່ກໍ່ຍັງມີຄວາມແຕກໂຕນກັນຫຼາຍໃນ 18 ແຂວງທົ່ວປະເທດ. ອັດຕາສ່ວນຂອງເດັກເຕ້ຍໃນນະຄອນຫຼວງວຽງຈັນແມ່ນຕໍ່າທີ່ສຸດ (13.6%) ແລະ ສູງທີ່ສຸດຢູ່ແຂວງຜົ້ງສາລີ (54%). ໃນຈຳວນ 18 ແຂວງນັ້ນມີ 8 ແຂວງທີ່ຍັງຄົງມີອັດຕາສ່ວນຂອງເດັກເຕ້ຍທີ່ສູງຫຼາຍ (ຫຼາຍກວ່າ ຫຼື ເທົ່າກັບ 40%) ເມື່ອທຽບໃສ່ 13 ແຂວງໃນ LSIS-I (ສຳຫຼວດຈາກ 17 ແຂວງ). ເດັກນ້ອຍໃນເຂດຊົນນະບົດທີ່ບໍ່ມີຖະໜົນຫົນທາງ, ຜູ້ເປັນແມ່ບໍ່ໄດ້ຮັບການສຶກສາ ແລະ ເກີດໃນຄອບຄົວທີ່ຈັດຢູ່ໃນກຸ່ມທີ່ທຸກຍາກທີ່ສຸດ ມີແນວໂນ້ມທີ່ຈະເປັນເດັກເຕ້ຍຫຼາຍກວ່າເດັກທີ່ເກີດໃນຕົວເມືອງ ທີ່ມີແມ່ທີ່ໄດ້ຮັບການສຶກສາ ແລະ ເກີດໃນຄອບຄົວທີ່ຈັດຢູ່ໃນກຸ່ມທີ່ຮັ່ງມີທີ່ສຸດ ສອງ ຫຼື ສາມເທົ່າຕົວ.
- ໃນລະຫວ່າງປີ 2015 (ການສຳຫຼວດປະເມີນຜົນຮ່າງກາຍຂອງເດັກ) ຫາປີ 2017 ມີອັດຕາການຫຼຸດລົງເລັກນ້ອຍ, ແຕ່ບໍ່ຫຼາຍ, ອັດຕາສ່ວນຂອງເດັກອາຍຸຕ່ຳກວ່າ 5 ປີທີ່ຂາດສານອາຫານ ຫຼື ຂາດສານອາຫານຂັ້ນຮຸນແຮງ (ນ້ຳໜັກຕໍ່ລວງສູງຕໍ່າ) ໄດ້ຫຼຸດລົງຈາກ 9,6% ເປັນ 9.0% . ອີງຕາມຂໍ້ມູນຂອງ LSIS-II, ໃນຈຳນວນ 18 ແຂວງ ມີ 6 ແຂວງ ມີອັດຕາການເພີ່ມຂຶ້ນຂອງເດັກຕຳກວ່າ 5 ປີ ທີ່ຂາດສານອາຫານຮູນແຮງ (ນ້ຳໜັກຕໍ່ລວງສູງຕໍ່າ).
- ການເລີ່ມຕົ້ນໃຫ້ນົມແມ່ໃນໄລຍະທຳອິດ (EIBF) ຢູ່ທີ່ 50.1% ໃນຂະນະທີປີ 2011 (LSIS-I) ແມ່ນ 39 ເປີເຊັນ. ໃນແງ່ຂອງການລ້ຽງລູກດ້ວຍນົມແມ່ພຽງຢ່າງດຽວໃນໄລຍະ 6 ເດືອນທຳອິດ, ເຫັນວ່າມີອັດຕາສ່ວນທີ່ເພີ່ມຂຶ້ນຕະຫຼອດໄລຍະ 5 ປີທີ່ຜ່ານມາ ຈາກ 40.1% ໃນປີ 2011 ເປັນ 44.9% ໃນປີ 2017.
- ຄວາມຖີ່ຂອງການໄດ້ຮັບອາຫານຂັ້ນຕ່ຳເດັກນ້ອຍອາຍຸ 6-23 ເດືອນມີສັດສ່ວນເພີ່ມຂຶ້ນຈາກ 43% ໃນປີ 2011 ເປັນ 69% ໃນປີ 2017. ນີ້ຖືເປັນການປັບປຸງແນວທາງການລ້ຽງລູກທີ່ດີ, ໂດຍທີ່ເດັກນ້ອຍທີ່ມີອາຍຸ 6-23 ເດືອນໜ້ອຍກວ່າກວ່າເຄິ່ງໜຶ່ງ ໄດ້ຮັບຄວາມຫຼາກຫຼາຍທາງດ້ານອາຫານຂັ້ນຕ່ຳ ຫຼື ຄວາມຫຼາກຫຼາຍຂອງອາຫານທີ່ຈຳເປັນຕໍ່ການເຕີບໂຕ ແລະ ການພັດທະນາທີ່ເໝາະສົມ.
- ຜູ້ຍິງລາວ 4 ໃນ 10 ຄົນແມ່ນເປັນໂລກເລືອດຈາງ. 1 ສ່ວນ 3 ຫຼື 33% ຂອງແມ່ຍິງແມ່ນເປັນໂລກເລືອດຈາງໃນລະດັບຕໍ່າ, 6% ໃນລະດັບປາກກາງ ແລະ ໜ້ອຍກວ່າ 1% ແມ່ນເປັນໂລກເລືອດຈາງໃນລະດັບຮຸນແຮງ. ແມ່ຍິງທີ່ອາໃສຢູ່ເຂດຊົນນະບົດທີ່ບໍ່ມີຖະໜົນຫົນທາງແມ່ນມີທ່າອ່ຽງທີ່ຈະເປັນໂລກເລືອດຈາງລາຍກວ່າແມ່ຍິງທີ່ຢູ່ເຂດຊົນນະບົດທີ່ມີຖະໜົນຫົນທາງ ( 42% ຕໍ່ 37%). ອັດຕາສ່ວນຂອງຜູ້ທີ່ເປັນໂລກເລືອດຈາງແມ່ນແຕກຕ່າງກັນໄປຕາມແຕ່ລະແຂວງ. ແມ່ຍິງຢູ່ແຂວງຄຳມ່ວນມີທ່າອ່ຽງທີ່ຈະເປັນໂລກເລືອດຈາງຫຼາຍກວ່າຜູ້ຍິງຢູ່ແຂວງຜົ້ງສາລີຫຼາຍກວ່າ 4 ເທົ່າ (62% ຕໍ່ 18%). 26% ຂອງເດັກນ້ອຍໃນ ສປປ ລາວ ແມ່ນເປັນໂລກເລືອດຈາງໃນລະດັບຕ່ຳ, 18% ໃນລະດັບປານກາງ ແລະ ຕ່ຳກວ່າ 1% ແມ່ນເປັນໂລກເລືອດຈາງໃນລະດັບຮຸນແຮງ. ເດັກອາຍຸຕ່ຳກວ່າ 5 ປີຢູ່ແຂວງຄຳມ່ວນແມ່ນມີທ່າອ່ຽງເປັນພະຍາດເລືອດຈາງຫຼາຍກວ່າເດັກທີ່ຢູ່ແຂວງຫົວພັນຫຼາຍກວ່າສອງເທົ່າ (59% ຕໍ່ 24%).
ເພື່ອແກ້ໄຂສິ່ງທ້າທາຍເຫຼົ່ານີ້, ຄະນະກຳມະການໂພຊະນາການແຫ່ງຊາດຈຶ່ງໄດ້ມີການປະສານງານດ້ານກິດຈະກຳໂພສະນາການສະເພາະດ້ານ ແລະ ໂພສະນາການເຊື່ອມສານ ໂດຍການສົ່ງເສີມໃຫ້ມີການເຊື່ອມສານລະຫວ່າງວຽກງານສາທາ, ສຶກສາ, ກະສິກຳ ແລະ ວຽກງານນ້ຳ, ສຸຂະພິບານ ແລະ ສຸຂະອະນາໄມ (WASH).